شفت أن كثير من هرگاوة طاحوا على السيد برادة وزير التعليم لمجرد انه قال: ما عنديش الجواب وغادي نبحث فيه ونعطيكم الجواب!
عجيب والله العظيم عجيب…ولكن لا عجب من تاهرگاويت المنتشرة في بلادنا…
اشنو هو الأحسن؟
واش بنادم للي يقول لك: ما عرفتش دابا…واعطيني الوقت نبحث ونجاوبك…
أو الهرگاوي للي توضع عليه السؤال، وحتى قبل أن يفكر دقيقة واحدة، يبدأ يشرّع في فمو ويجاوبك باش ماكان…ويگول ليك للي بغيتي تسمعو أنت…ويعرْعرْ عليك بللي كان باش أنت تسكت وتسرط للي بغاك تسرطو!؟
شخصياً…الطلبة للي كا يعقلو على سنوات كليات الحقوق أو معاهد الصحافة للي درّست خلالها، يعرفون ويعلمون علم اليقين العيني انه ماحصل ان جاوبت على سؤال لا اعلم جوابه…ملي ما كانعرفش، كانگول ما عرفتش، وغدّا نجاوبك ملي نبحث على خاطري وفي العشية راني في المكتبة…
ولكن الهرگاوي كايبقى هرگاوي لأنه هو بنفسو كذّاب ولد كذّاب…تسوّلو على شي حاجة، يبدا يسرْسرْ غا بالكذوب…وباغي گاع الناس يكونوا بحالو…عندو المعرفة والوعورية والقْفازة هي انك تتكلم واخا تكون أجْهلْ من بنكيران وأجهل من العثماني…
واحد الملاحظة لابد منها: بالرب للي خالق الدنيا والدين هاذ برادة وزير التعليم ما كانعرف طاسيلتو ولا عمرني سمعت بيه…
ولكن هاذ الحادثة خلاتني يعجبني بالتصرف العقلاني والصريح والأمين ديالو…تصرف للي اصبح قليل بزاف عندنا…مع انه تصرف جاري بيه العمل في البلدان للي رضى عليها الرب سبحاناه …
وسدّات مادام…
*عبد اللطيف أكنوش/جامعي